هل الهاتف فعلا يستحق الشراء

كترت الاسئلة عن هاتف هواوي ال Y9 Prime 2020

هل اشتري الهاتف بالسعر الحالي ؟!
هل الهاتف فعلا يستحق الشراء ⁦؟

بعيدا عن البيع والشراء
انا حقول راي الشخصي في الهاتف

بالنسبة لي وبكل صراحة لا يستحق الشراء بالمبلغ ده

لو انت/ي مستخدم عادي للفئة المتوسطة ما حتحس بجديد غير انك شايل تلفون Pop-up كاميرا او كاميرا منبثقة

هل الشي الجديد بستحق اني ادفع فرق ٥٠٠٠ جنية سوداني مثلا من ال y9 2019 العادي ⁦‼️⁩

خلونا عمليين اكتر الهاتف بالمعالج كيرن 710F عامل اسكور علي Antutu انتوتو 140000 نقطة ال Y9 2019 العادي بالمعالج كيرن 710 عامل 138500 نقطة
ده يعتبر ما فرق انت حتحسه خصوصا انهم الاتنين حيكونوا شغالين بنفس واجهة هواوي EMUI وهنا عدد النقاط بفرق كتير طبعا

الهاتف بالنسبة لي في الحقيقة ماقدم شي جديد سواء من خامات تصنيع او شاشة او معالج او بطارية

الجديد في الهاتف فقط بالنسبة لي هو الكاميرا المنبثقة ال Pop-up ودي تعتبر آلية عمل للسيلفي كاميرا والشي التاني التحسينات الفي العدسات الحتديك صور نوعا ما افضل لكن ما افضل صور في الفئة السعرية دي

ال Popup كاميرا الفي الهاتف عليها كلام عالميا وواحد من اهم اسباب تحديد ترشيحات المراجعين هو راي المستخدم والعيوب البتظهر بعد الاستخدام

مستخدم ال Mid-range او الفئة المتوسطة ما اعتقد انه ممكن يدفع ٥ الف كمبلغ زيادة عشان يعاين لكاميرا بتطلع وتدخل حركيا مع تقديم شي بسيط اضافي مع اعتبار نقطة مهمة انه فرق المبلغ ده كبير نوعا ما بالنسبة لمستخدم الفئة المتوسطة

الفئة المتوسطة دي اكتر فئة مستخدمين عليها تركيز حاليا من الشركات عشان كدة حتلقي خيارات واسعة جدا في نفس الفئة السعرية للهاتف وبأفضلية واضحة شديد

معالج الكيرن 710F اعتقد انه ماقدم شي يذكر او خلونا نقول النقله الواضحة للهاتف واعتقد انه المعالج هواوي نفسها ما مقتنعه بيه واهو مجرد تسويق ليس الا ومافي فروقات كبيرة من الكيرن 710 الهو حاليا منتشر جدا في مجموعة كبيرة من الهواتف

بإختصار شديد لو انت/ي ميزانيتك بتسمح ليك تشتري ال Y9 Prime 2019 فبكل صراحة ما انصحك بالشراء ووفر قروشك واذا مستخدم لل Y9 2019 وعايز تعمل Upgrade لتلفونك وتجيب البرايم مااعتقد انك حتحس بفرق يستحق انك تدفع عشانه المبلغ ده

اخوانا في هواوي ممكن يزعلوا شوية لكن ده راي الشخصي بالاضافة لي راي المستخدم ، ونقطة ثبات سعر الهاتف بعد الاستخدام والمهم بالنسبة لي هو التلفون ما بحقق مبدأ القيمة مقابل السعر

ده راي الشخصي حتسألني في المسجات ، في التلفون ، في اي مكان حيكون ده راي ونفس الإجابة

وكل الحب والاحترام والتقدير لكم جميعا