بخصوص الواجهات ui

عشان كل الناس تكون مع بعض في الصورة وكمان للناس الماعارفة

نظام التشغيل اندرويد :-

الاندرويد نظام تشغيل مجاني مفتوح المصدر تابع لشركة قوقل ممكن تاخد الكود وتعدل عليه تماما وده بتم بترخيص وإتفاق مع قوقل او كمان بدونها بس بدونها ممكن يسبب ليك مشاكل في استخدام تطبيقات وخدمات قوقل وبعض الاجراءات الاخري

قوقل بتدعم بصورة مباشرة الاتي من الاندرويد

واحد الاندرويد الخام او ال Stock Android

ده تقدر تقول انه الزعيم والهو اندرويد خام خالي من اي تعديلات كبيرة بتميز بالخفة الشديدة وبديك اداء سلس جدا وبكون في هواتف نيكسس وحاليا بيكسل وبتضمن تحديثات دروية لمدة ٣ اعوام علي الاقل من قوقل نفسها وصراحة بتاخد اداء عالي السوفتوير

قوقل عملت حركتين ظراف جدا

في 2014 اعلنت عن

اندرويد ون Android One

ده الاخ الاصغر للزعيم نفس اندرويد خام برضو من غير اي تعديلات وقوقل بتضمن دعم الهاتف بالتحديثات الدورية لمدة ٣ اعوام لكن صمم للهواتف المن الشركات الاخري يعني غير قوقل عشان تعمل بكفاءة واداء عالي وتريحك من مشاكل تحديثات الشركات البتتأخر وكمان عيوب السوفتوير البأثر علي عتاد واداء الهواتف

وبتلقي كتير جدا في هواتف نوكيا ، موتوريلا والشركات الاخري المتعاقدة مع قوقل

اتنين اندرويد قو Android Go

ده نفس الفوق بس للهواتف الاقتصادية والامكانياتها بسيطة يعني بديك تجربة استخدام اندرويد خام في تلفون اقتصادي بإمكانيات بسيطة وكمان بتاخد تحديثات دورية يعني مثلا هاتف زي نوكيا ون حيحصل علي اندرويد 10 Go

حاليا بقي اصبح في عيب شوية وهو انه الشركات بقت تتحكم في التحديثات والنظام بس طبعا بإشراف مباشر من قوقل لكن برضو ما زي لمن يكون الدعم الكامل للنظام منها
دي بتريحك جدا وده واحد من مميزات هواتف بيكسل

طبعا كل ده بتم بإتفاق الشركات مع قوقل بالنسبة لاندرويد ون او اندرويد Go عشان تقدر توفر ليهم نظام التشغيل المختار لهواتفهم الحيعلنوا عنها بواحد منهم

في ناس كتيرة بتفضل الاندرويد الخام وفي ناس طبعا لا والاكثر انتشارا هو طبعا الاندرويد المعدل

ايواااا ، المعدل
هنا كدة يادوب بدأ اللعب

بتعدل كيف من الشركات والعملية بتم بالضبط كيف من سامسونج ، هواوي ، شاومي والبحصل شنو وكيف والافضل في التعديلات والاختلاف والمميزات والعيوب واخيرا الاسماء لكل نظام معدل وتبيعة اي شركة

معظمنا طبعا شغال بالمعدل

عشان كدة كل ده حنعرفوا بالتفصيل ان شاء الله اكتر وحنخليهو في بوست منفصل عشان المنشور حيكون كتير وبتفاصيل عديدة

وكل الحب والاحترام والتقدير لكم جميعا